Кыргыз Республикасынын Президентин жана Жогорку Кеңештин депутаттарын шайлоо боюнча мыйзам бузулуштарын аныктоо максатында БШКнын атайын жумушчу тобу мониторинг жүргүзүп, катышуучулардын кайрылууларын жана арыздарын карады. Бул тууралуу БШКнын өкүлү Абдыжапар Бекматов билдирди.

Жалпысынан 189 кайрылуу келип түшүп, БШК тарабынан каралып чыкты. Анын 124ү жумушчу топтун мониторингинин натыйжасында, 65и шайлоо процессинин катышуучуларынын арыздарынын негизинде каралды. Натыйжада 39 талапкерге чара көрүлүп, эскертүүлөр берилди жана айып пул салынды.

Мындан тышкары, 27 талапкердин өкүлдөрү, жакындары жана үгүтчүлөрү тарабынан мыйзам бузуулар аныкталып, 65–66-беренелердин негизинде чаралар көрүлдү. Ошондой эле 7 юридикалык тарапка 66–67-беренелердин негизинде айып пул салуу боюнча сунуштар берилди. Булардын ичинде Массалык маалымат каражаттары жана жарнамалык агенттиктер бар.

Ошондой эле 29-ноябрга чейин түшкөн кайрылуулардын негизинде айып пулдардын жалпы суммасы 700 миң сомду түздү.