Суу ресурстары, айыл чарба жана кайра иштетүү өнөр жайы министри Бакыт Төрөбаев Биринчи радионун “Таңкы Кыргызстан” уктуруусунда берген маегинде өлкөнүн социалдык-экономикалык өнүгүүсүнүн жыйынтыктары тууралуу маалымат берди.

Министрдин айтымында, 2025-жылдын 11 айында Кыргыз Республикасынын ички дүң продукциясы 1 триллион 628 миллиард сомго жакындады. Жыл жыйынтыгы менен бул көрсөткүч дагы өсөрү күтүлүүдө. ИДПнын жалпы өсүү темпи 10,2 пайызды түздү.

Тармактар боюнча өсүү төмөнкүдөй болду:

– өндүрүш тармагында – 10,2%,

– курулушта – 29%,

– кызмат көрсөтүү секторунда – 8,9%,

– айыл чарба тармагында – 2%.

Бакыт Төрөбаев белгилегендей, 2025-жыл кургакчыл болгондугуна карабастан, айыл чарба тармагында оң өсүү темпи сакталды. Бул көрсөткүч агрардык сектордун туруктуулугун, мамлекеттик колдоонун жана жүргүзүлүп жаткан реформалардын натыйжалуулугун айгинелейт.

Айыл чарба өлкөнүн азык-түлүк коопсуздугун камсыздоодо жана жалпы экономикалык өсүшкө салым кошууда маанилүү ролду ойноону улантууда.