“Салык сервис” ММ  жарандардын   ыңгайлуулугу үчүн  салык календарын сунуштады. Бул календарь кайсы салыктарды ким жана кандай мөөнөттөрдө төлөшү керектигин көрсөтөт. Мындан тышкары  кайсы учурларда салыктан бошотуу каралганын түшүнүүгө жардам берет.

Жалпы маалыматка ээ болгондо да, конкреттүү адамга кайсы салык милдеттенмелери тиешелүү экенин аныктоо ар дайым эле оңой боло бербейт. Жаңы календарь ар бир жаран өз категориясын тез таап, өзүнүн салык милдеттери тууралуу так маалымат ала тургандай кылып иштелип чыккан.

Салык календарын кантип колдонуу керек?

Календарь визуалдык жол көрсөтүү тартиби  менен түзүлгөн. Жарандардын ар бир категориясы өзүнчө түс менен белгиленген. Мисалы, бюджеттик тармактын кызматкерлери жашыл квадрат менен көрсөтүлгөн. Өз милдеттериңизди аныктоо үчүн өз түсүңүздү таап, тиешелүү белгилерге  көңүл буруңуз — алар төлөнүүгө тийиш болгон салыктарды көрсөтөт.

Маанилүү: мүлк салыктары сиз тиешелүү мүлккө — кампага, гаражга, контейнерге, батирге, турак жайга же жер тилкесине ээ болгон учурда гана төлөнөт.

Салык декларациясын тапшыруу тууралуу

Кыргызстандын жарандарынын көпчүлүгү салык декларациясын тапшыруу милдетинен бошотулган. Бирок айрым учурларда декларация тапшыруу зарыл. Мындай жагдайлардын тизмеси да салык календарында кеңири көрсөтүлгөн.

Салык календары — бул салык милдеттенмелерин өз убагында аткарууга жана мүмкүн болгон айып пулдардан сактанууга жардам берген жөнөкөй жана жеткиликтүү курал. Аны менен таанышып, өз категорияңызды табыңыз жана салык мыйзамдарынын талаптарын сактоодо ишенимдүү болуңуз.