АКШ президенти Дональд Трамп 28-февралда Вашингтондун Иранга каршы «ири масштабдагы аскердик операция» баштаганын жарыялады. Буга чейин, бир нече саат мурда, Израил Иранга «алдын алуучу сокку» урганын билдирген.
Ошол эле маалда Израил армиясы (ЦАХАЛ) өлкө аймагына Иран тарабынан учурулган ракеталар катталганын маалымдады.
Эки күн мурда АКШ менен Иран Омандын ортомчулугу астында өзөктүк маселе боюнча сүйлөшүүлөрдүн жаңы айлампасын өткөрүшкөн.
Ирандын мамлекеттик IRNA агенттиги Иорданиядагы Мукаф ас-Салти аба базасында жарылуу болгонун кабарлады. Бул база агенттиктин маалыматына ылайык, «АКШнын аймактагы эң маанилүү аскердик жайларынын бири» жана «америкалык логистиканын борбору» катары мүнөздөлөт.
Андан мурда Fars агенттиги Ислам революциясынын сакчылар корпусуна таянып, Иран Перс булуңунда жайгашкан америкалык аскердик объектилерге сокку урганын билдирген. Маалыматка ылайык, ракеталык чабуулдар Катардагы ал-Удейд, Кувейттеги Али ал-Салем, БАЭдеги ал-Дафра аба базаларына жана Бахрейндеги АКШнын деңиз флотунун Бешинчи флотунун базасына багытталган.
Reuters агенттиги Дохада жана ал-Удейд базасынын айланасында бир нече жарылуу болгонун жазды. Катардын Коргоо министрлиги ракеталар абадан атып түшүрүлгөнүн билдирди.
Ошондой эле Сауд Арабиясынын борбору Эр-Риядда жана Бириккен Араб Эмирликтеринин борбору Абу-Дабиде жарылуулар катталганы маалымдалды.
Ирандын Коргоо министрлиги болсо расмий билдирүү жасап, «АКШнын аймактагы бардык аскердик базалары» жооп иретиндеги соккулардын бутасына айланышы мүмкүн экенин эскертти.
Европа Биримдигинин тышкы саясат боюнча башкы комиссары Кая Каллас АКШ менен Израилдин Иранга каршы аба соккулары жана Тегерандын жооп чаралары аймактагы кырдаалды кооптуу нукка бурушу мүмкүн экенин белгиледи. Ал Х социалдык тармагындагы баракчасында Еврошаркет араб өнөктөштөрү менен тыгыз байланышта болуп, дипломатиялык жолдорду издеп жатканын жазды.
Калластын айтымында, жайкын тургундарды коргоо жана эл аралык гуманитардык укукту сактоо артыкчылыктуу маселе бойдон калууда. Ошондой эле Евробиримдиктин консулдук кызматтары аймактагы жарандарды эвакуациялоого көмөктөшүп, кызматкерлердин бир бөлүгүн чыгарып кетүү ишин жүргүзүп жатат.
