Мундиаль-2026 футбол дүйнөсүндөгү тарыхый окуялар менен да эсте калары күтүлүүдө. Күйөрмандар бир доор спорттон кетерин болжошууда. Легендарлуу атаандаштар Роналду менен Месси үчүн бул акыркы Дүйнөлүк чемпионат болушу мүмкүн.

2026-жылдын 11-июнунан 19-июлуна чейин АКШ, Канада жана Мексикада өтө турган футбол боюнча дүйнө чемпионатын УТРК жана УТРК Спорт каналдары кыргызстандык күйөрмандарга түз эфирде көрсөтөт.

Криштиану Роналду 41 жашта. Бул анын алтынчы Дүйнө чемпионаты. Көпчүлүк эксперттер муну Роналдунун акыркы дүйнө чемпионаты деп эсептешет. Португалия фаворит командалардын катарында бар болгондуктан Криштиану Роналдуда көксөгөн кубокко жетүү мүмкүнчүлүгү да жогору.

Лионел Месси 38 жашта. 2022-жылы чемпион болгондон кийин да карьерасын улантып, дагы бир дүйнө чемпионатына катышууда. Бул анын акыркы дүйнө чемпионаты болушу ыктымал.

Лука Модрич 40 жашта. Хорватиянын легендасы үчүн да бул акыркы дүйнө чемпионаты катары каралууда. Лука Модрич өз командасын Дүйнө чемпиондуктарында байгелүү орундарды алууга чоң салым кошуп келген. Бул жолку Дүйнө чемпиондугунан кийин Хорватия футболчуну сый менен узатарында шек жок.

Мауэль Нойер 40 жашта. Германиянын атактуу дарбазачысы 2024-жылы карьерасын жыйынтыктаганын жарыялаган. Бирок Германия курамасынын башкы тренери Нойерди Дүйнө Чемпионатка баруучу командага кошкон. Голкипер маанилүү оюндарда дарбазада турарын айткан. Бул чемпионат спортчу үчүн акыркы ири турнир болушу мүмкүн.

Неймар 34 жашта. Бразилиялык футболчу алган жаракаттарынан улам көп беттештерге катышпай келген. Акыркы жолу 2023-жылы Бразилия курама командасы үчүн оюн өткөргөн. Курама командага кириши күмөндүү болуп тургандыктан тизмеге киргенин укканда көзүнө жаш алган эле. Бирок жаракаттарынан улам Дүйнө чемпионатынын алдындагы жолдоштук беттештерге катышкан жок. Ошентсе да ден соолугу калыбына келсе оюндардын экинчи этабына катышаары болжолдонууда. Бул Дүйнө чемпионаты Неймар үчүн акыркы болушу ыктымал.

Кызматташуу үчүн 0 554 455 444 телефону же ktrkadver@gmail.com электрондук дареги аркылуу кайрылсаңыздар болот.