Бүгүн, 5-ноябрда, Кыргыз Республикасынын Министрлер Кабинетинин Төрагасы - Кыргыз Республикасынын Президентинин Администрациясынын жетекчиси Адылбек Касымалиевдин онлайн катышуусунда Манас шаарынын Чолок-Терек айылында жаңы мектептин ачылыш аземи болуп өттү. Бул тууралуу Курулуш министрлигинин басма сөз кызматы билдирди.

Маалыматка караганда ачылыш аземине жергиликтүү бийлик өкүлдөрү жана айыл тургундары катышты. Жаңы мектептин курулушу үстүбүздөгү жылдын февраль айында Курулуш министрлиги тарабынан башталган.

Архитектуралык долбоорго ылайык, мектеп 375 орунга ылайыкталган үч кабаттан туруп, жалпы аянты 4 048 чарчы метрди түзөт. Билим берүү мекемесинде окуучулардын сапаттуу билим алуусу жана мугалимдердин иштөөсү үчүн бардык шарттар каралган.

Атап айтканда, предметтик окуу кабинеттер, лаборатория, китепкана, ашкана, компьютердик класс, жыйындар залы жана спорт зал бар. Мындан тышкары, мектептин аймагында футбол, волейбол жана баскетбол ойноого ылайыкталган спорт аянтчалары курулган.