Токиодо XXV Сурдлимпиада оюндары жыйынтыкталды: Кыргызстандын курама командасы алты медаль жеңди

Бүгүн, 26-ноябрда Япониянын Токио шаарында Сурдлимпиада кыймылынын 100 жылдыгына арналган XXV Сурдлимпиада оюндарынын жабылыш аземи болуп өттү. Бул тууралуу  Дене тарбия жана спорт  мамлекеттик агенттиги маалымдады.  

Быйылкы оюндарга 81 өлкөдөн 3000ден ашуун спортчу катышып, спорттун 19 түрү боюнча медалдар ойнотулду. Кыргызстан курамасынын атынан эркин күрөш, грек-рим күрөшү, таэквондо, дзюдо жана стол тенниси боюнча 18 спортчу ат салышты.

Турнирдин жыйынтыгында кыргызстандык спортчулар жалпы алты медаль утту: эки алтын жана төрт коло.

Алтын медаль ээлери:

Смадияр Жумакадыров – грек-рим күрөшү, 60 кг;

Адилет Жапаркулов – эркин күрөш, 74 кг.

Коло медаль ээлери:

Динмухамед Бигелдиев – грек-рим күрөшү, 67 кг;

Нарту Абдрахманов – грек-рим күрөшү, 97 кг;

Байсалбек Орозали уулу – дзюдо, 60 кг.

Азамат Мавлонов – таэквондо, 80 кг.

Сурдлимпиада оюндары (Deaflympics) - угуу мүмкүнчүлүгү чектелген спортчулар үчүн эң ири эл аралык спорттук мелдеш. Ал төрт жылда бир өткөрүлүп, эл аралык олимпиада комитети тарабынан таанылган. Сурдлимпиада кыймылы 1924-жылы Парижде башталып, анын өзгөчөлүгү - оюндардын уюштурулушу жана башкарылышы толугу менен эл аралык дүлөйлөр спорту комитети (ICSD) аркылуу жүргүзүлөт.

Токиодо өткөн быйылкы оюндар 15-ноябрдан 26-ноябрга чейин созулуп, Сурдлимпиада кыймылынын 100 жылдык мааракесин жыйынтыктады.