Добуш берүүнүн бардык этаптары толук автоматташтырылып, адам фактору мүмкүн болушунча жоюлду. Бул тууралуу өлкө башчы Садыр Жапаров билдирди.

Мамлекет башчынын айтымында, кийинки жылы болчу президенттик шайлоо үчүн да мындан да жакшы шарттар каралат.

“Урматтуу кыргызстандыктар жана шайлоочулар!

Бүгүн өлкөдө Жогорку Кеңештин депутаттарын шайлоо өтүүдө. Бардыгыңыздарды жарандык милдетти аткарып, добуш берүүдө активдүү болууга чакырабыз.

Бул шайлоо өзгөчө маанилүү. Анткени добуш берүүнүн бардык этаптары толук автоматташтырылып, адам фактору мүмкүн болушунча жоюлду. Мурдагыдай бюллетень кошумчалап салуу, ашыкча белгилөө сыяктуу мыйзам бузууларга жол бербөө үчүн техникалык система толук иштеп жатат.

Өлкөбүздө болгон үч ири саясий төңкөрүш тең ушул шайлоонун кесепетинен келип чыккан. Ошондуктан мындай көрүнүштөрдү кайталабоо максатында шайлоо процесси максималдуу деңгээлде автоматташтырылды. Аралыктан добуш берүү да электрондук форматка өткөрүлүп, жарандарыбыз үчүн дагы кеңири мүмкүнчүлүк түзүлдү.

Кийинки жылы болчу президенттик шайлоо үчүн да мындан да жакшы шарттар каралат — адамдык фактордон толук арылган, ишенимдүү система түзүү пландалууда.

Азыркы учурда бир гана маселе – добуш сатып алуу жана сатуу фактылары болуп жатат. Мындай учурлар боюнча тиешелүү органдар териштирүү иштерин жүргүзүүдө. Албетте, бардык шайлоочулар добушун сатып жатат деп айтууга болбойт. Элдин басымдуу бөлүгү акчага кызыкпайт, таза позицияны карманат.

Элибизден суранарыбыз — биз шайлоо системасын жакшыртып, таза шарт түзүп бердик. Эми добушун саткан жана сатып алам дегендерди эл өзү таразалайт”,-деди президент Садыр Жапаров.

Белгилей кетсек, президент Садыр Жапаров Бишкектеги №1046 шайлоо тилкесинен добуш берди.