Бүгүн, 5-ноябрда, Кыргыз Республикасынын Министрлер Кабинетинин Төрагасы - Президентинин Администрациясынын жетекчиси Адылбек Касымалиевдин онлайн катышуусунда Жалал-Абад облусунун Базар-Коргон районундагы Катар-Жаңгак айылында Ж. Канашев атындагы жаңы мектептин ачылыш аземи болуп өттү. Бул тууралуу Курулуш министрлигинин басма сөз кызматы билдирди.

Долбоор республикалык бюджеттин эсебинен каржыланып, объекттин жалпы наркы 149 миллион сомду түздү. Мектептин курулушу 2025-жылдын январь айында башталган. Архитектуралык долбоорго ылайык, мектеп 225 окуучуга ылайыкталган. Эки кабаттуу имаратта окуу кабинеттеринен тышкары, эмгек класстары, ашкана, китепкана, жыйындар залы жана спорт залы каралган. Мектептин жалпы аянты 2201 чарчы метрди түзөт.

Объекттин курулуш сапаты жана аткарылган иштердин талаптарга шайкештиги Курулуш министрлигине караштуу тиешелүү департаменттер тарабынан көзөмөлгө алынган.