Кыргыз Республикасынын маданиятына эмгек сиңирген ишмер, КТРдин отличниги, өмүрүн ата мекендик маданиятка кызмат кылууга арнаган Ирина Иванованын 73 жаш курагында дүйнөдөн кайтты.

Ирина Иванованын ысымы кыргыз радиосунун тарыхы менен тыгыз байланышта. Ал көп жылдык чыгармачылык жана кесиптик ишмердүүлүгүндө өлкөбүздүн маданий турмушунда өзгөчө орду бар чыгармаларды жаратып, радионун алтын казынасына баалуу мурас калтырды.

Анын чыгармачылык мурасында "Слово", "Дочери земли кыргызской…", "Достояние республики" аттуу берүүлөр өзгөчө орунду ээлейт. Ар бир берүүнүн өзүнө таандык мазмуну, маани-маңызы жана коомдук мааниси бар эле. Ал бул берүүлөр аркылуу тагдыры жана жетишкендиктери Кыргызстандын тарыхынын бир бөлүгүнө айланган инсандар тууралуу баян куруп, угармандарды улуттук маданияттын байлыгы, руханий баалуулуктар жана элибиздин көрүнүктүү өкүлдөрү менен тааныштырып келген.

Ал жараткан берүүлөр - өлкөбүздүн инсандары, тагдырлары, жетишкендиктери жана маданий баалуулуктары тууралуу өзүнчө бир тарыхый баян. Бул мурас радиоугармандардын эсинде жана ата мекендик радиоберүүнүн архивинде жашай берет.

Бул жөн гана кесиптик ишмердүүлүк эмес, маданиятка, тарыхый эс тутумду сактоого жана руханий мурасты кийинки муундарга өткөрүп берүүгө болгон чыныгы кызмат эле.

Анын кесипкөйлүгү, чыгармачылыкка берилгендиги, маданиятка жана адамдарга болгон терең урмат-сыйы кесиптештеринин, радиоугармандардын жана анын чыгармачылыгына күбө болгон бардык адамдардын эсинде түбөлүк сакталат.

Адам бул дүйнөдөн өтөт, бирок анын жасаган иштери, жараткан чыгармалары, идеялары жана артында калтырган жарык изи жашай берет. Анын ысымы жана чыгармачылык мурасы Кыргызстандын маданият тарыхында татыктуу ордун сактап кала берсин.

Кыргыз Республикасынын Улуттук телерадиоберүү корпорациясынын жалпы жамааты Ирина Иванованын үй-бүлөсүнө, жакындарына, кесиптештерине, досторуна жана аны таанып-билип, баалап-барктагандардын баарына терең кайгыруу менен көңүл айтат.