Кара-Балта шаарындагы кыш заводунда таштандыларды мыйзамсыз өрттөө фактысы катталды. Бул боюнча социалдык тармактарга чыккан жергиликтүү тургундардын видео кайрылуусунан кийин маалым болуп, экоинспекторлор тарабынан тиешелүү чаралар көрүлдү. Бул тууралуу Жаратылыш ресурстары министрлигинен билдиришти.

Аталган факты боюнча инспекторлор тарабынан тиешелүү текшерүү иш-чаралары жүргүзүлүп, юридикалык жакка карата Кыргыз Республикасынын Укук бузуулар жөнүндө кодексинин 115-беренесинин 1-бөлүгү жана 3-бөлүгү боюнча административдик укук бузуу жөнүндө протоколдор түзүлгөн. Жыйынтыгында ишканага 17 000 сом жана 23 000 сом, жалпы 40 000 сом административдик айып пул салынды.

"Заводдун өкүлдөрүнө Кыргыз Республикасынын жаратылышты коргоо мыйзамдарынын талаптарын так сактоо жана мындай укук бузууларга мындан ары жол бербөө боюнча түшүндүрүү иштери жүргүзүлдү. Айлана-чөйрөнү коргоо - ар бир ишкананын жоопкерчилиги. Экологиялык жана техникалык көзөмөл кызматы жарандардын кайрылууларынын негизинде аныкталган экологиялык мыйзам бузууларга карата тиешелүү чараларды көрүүнү улантат", - деп айтылат маалыматта.