Бишкектеги жол инфраструктурасында дагы бир чоң өзгөрүү! Шабдан Баатыр жана Иманалы Айдарбеков көчөлөрүнүн кесилишиндеги көпүрөнүн курулушу кызуу уланууда. Бул тууралуу Бишкек шаарынын мэриясынын Транспорт жана жол-транспорттук инфратүзүмдү өнүктүрүү департаментинен билдиришти.
Учурда экинчи көпүрөгө бетон куюлуп, негизги устундары орнотулуп жатат. Ошондой эле жер жумуштары жүрүп, конструкциялар бекемделүүдө.
Курулуш иштери белгиленген графикке ылайык аткарылууда. Белгилей кетсек, 2026-жылдын аягына чейин Шабдан Баатыр көчөсү тараптагы жол тилкесин убактылуу ачуу пландалууда.
Жаңы көпүрө пайдаланууга берилгенде бул аймактагы жол кыймылын жакшыртууга жана шаар тургундарынын жүрүүсүнө ыңгайлуу шарт түзүүгө өбөлгө болот.