Эркин күрөш боюнча Кыргызстандын улуттук курамасынын мүчөсү Билол Шарип уулу Сауд Аравияда өтүп жаткан Ислам тилектештиги оюндарында коло байгенин ээси болду. Ал 65 кг салмак категориясында күч сынашып, мелдешти 1/8 финалдан баштаган.

Алгач палестиналык балбан Абдулла Ассафты 10:0 эсебинде таза утуп, чейрек финалда тажикстандык Абдулмажид Кудиевге 6:2 эсебинде алдырып койгон.

Бирок, кийин көңүл жубатуучу беттешке чыгуу мүмкүнчүлүгүн алып, биринчи айлампада тунисдик Фарук Желассини 10:0 эсебинде жеңген.

Коло байге үчүн болгон чечүүчү таймашта бахрейндик Алибек Алибеговду дагы 10:0 эсебинде утуп, Кыргызстандын эсебине дагы бир медаль алып келди.