Садыр Жапаров коррупцияга каршы күрөштө принципиалдуу чечимдер кабыл алынганын билдирди. Анын айтымында, антикоррупциялык иш-чаралардын алкагында миңдеген кыймылсыз мүлк объектилери мамлекетке кайтарылып, 959 объекти мамлекеттик жана муниципалдык органдарга өткөрүлүп берилген. Ошондой эле 3 300 гектардан ашык айыл чарба жери жергиликтүү өз алдынча башкаруу органдарына кайтарылган.

Мындан тышкары, уюшкан кылмыштуу топтордун 300дөн ашык мүчөсү жоопкерчиликке тартылып, мамлекетке келтирилген 38 миллиард сомдон ашык зыян өндүрүлгөн.

Ички иштер министрлигинде жүргүзүлгөн санариптик трансформациянын натыйжасында кылмыштуулук 73%га кыскарып, коомдук жайлардагы оор мыйзам бузуулар 68%га азайганы маалымдалды. Президент бул аракеттер мыйзам үстөмдүгүн камсыз кылууга жана жарандардын коопсуздугун бекемдөөгө багытталганын белгиледи.