Хоккей боюнча Кыргызстандын улуттук курама командасы дүйнө чемпионатынын экинчи дивизионунун (B тайпасы) алкагында дебюттук оюнун ийгиликтүү баштады. 

София шаарындагы Кышкы спорт сарайында өткөн беттеште биздин хоккейчилер турнирдин кожоюндарын — Болгария курамасын 5:3 эсебинде ишенимдүү түрдө жеңип алышты.  Беттештин башкы каарманы үч шайба киргизип, хет-трик жасаган Ислам Абдыраев болду.

 
Кыргызстан курама командасынын голдору жана ассисттери:
1:0 — Мамед Касабеков (00:32), ассистентсиз.  
2:0 — Ислам Абдыраев (02:18), ассистенттер: Михаил Чувалов жана Александр Титов.
3:0 — Ислам Абдыраев (03:10), ассистент: Максим Егоров.
4:1 — Артем Кузьмич (18:41), ассистенттер: Георгий Фитисенко жана Евгений Мирнов.
5:2 — Ислам Абдыраев (20:25), ассистент: Антон Кудашев.

«Бул биздин бул дивизиондогу алгачкы жана абдан маанилүү жеңишибиз. Биз кыргыз хоккейи эл аралык деңгээлде татыктуу атаандаштык жарата аларын далилдедик. Алдыда бизди жаңы чакырыктар жана андан да күчтүү атаандаштар күтүп турат, бирок биз бул медалдарга карай чоң жолдун башталышы гана экенине ишенебиз. Азыр командага ар бир кыргызстандыктын колдоосу болуп көрбөгөндөй зарыл. Сиздердин бизге болгон ишенимиңиздер акыркы секундага чейин күрөшүүгө күч берет!» — деп белгилешти улуттук курама команданын машыктыруучулар штабынан.

Хоккей федерациясы бардык кыргызстандыктарды команданын оюндарын байкап турууга жана жигиттерди социалдык тармактарда, трибуналарда колдоого чакырат.