15-апрелде Министрлер Кабинетинин Төрагасы Адылбек Касымалиев Америка Кошмо Штаттарына болгон жумуш сапарынын алкагында Meta Platforms компаниясынын мамлекеттик саясат маселелери боюнча директору Молли Монтгомери менен жолукту.

Сүйлөшүүлөрдүн расмий бөлүгүнүн алдында Метанын Вашингтондогу технологиялык борборун кыдыруу болду.

МинКаб Төрагасына компаниянын дүйнөлүк санариптик тенденциялар жаралган уникалдуу инновациялык экосистемасы көрсөтүлдү.

Презентация кийилүүчү электроника жана кеңейтилген реалдуулук (AR) тармагындагы заманбап өнүгүүлөргө өзгөчө басым жасады. Адылбек Касымалиевге жасалма интеллект орнотулган акыркы үлгүдөгү акылдуу көз айнектердин мүмкүнчүлүктөрү көрсөтүлдү. Мындай технологиялар медицина жана билим берүү үчүн гана эмес, социалдык инклюзивдүүлүктү жогорулатуу үчүн, тагыраак айтканда, ден соолугунун мүмкүнчүлүгү чектелген адамдар үчүн санариптик жардамчы инструменттерди түзүү үчүн жаңы горизонтторду ачары белгиленди.

Кийинки сүйлөшүүлөрдүн жүрүшүндө тараптар институттук кызматташтыкты чыңдоого багытталган маселелердин кеңири чөйрөсүн талкуулашты.

Адылбек Касымалиев Мета менен өз ара аракеттенүүнүн туруктуу жана юридикалык жактан негизделген механизмин түзүүгө кызыкдар экенин билдирди. Ал пайда болгон маселелерди тез арада чечүү жана бюрократиялык процедураларды минималдаштыруу үчүн түз байланыш каналдарын түзүүнүн маанилүүлүгүн белгиледи.

МинКаб Төрагасы маалымат коопсуздугуна өзгөчө басым жасады. Кыргызстандын коопсуз санариптик чөйрөнү түзүү боюнча алдыңкы эл аралык тажрыйбаны ишке ашырууга даярдыгы айтылды.

Өз кезегинде Молли Монтгомери кыргыз тараптын демилгесин кубаттап, өлкөнүн санариптик трансформациядагы ийгиликтерин жогору баалады. Ал Метанын диалогду тереңдетүүгө даярдыгын ырастап, компаниянын Кыргызстандагы колдонуучулар үчүн коопсуз шарттарды түзүүгө кызыкдар экенин белгиледи. Мета өкүлү жолугушууда айтылган сунуштарды колдоорун билдирди.

Жолугушуунун жыйынтыгында эки тараптын компетенттүү кызматкерлеринен турган биргелешкен жумушчу топ түзүү боюнча макулдашууга жетишилди. Топтун ишмердүүлүгү мындан аркы кызматташуунун деталдуу жол картасын иштеп чыгууга, анын ичинде маалыматтык коопсуздукту, мамлекеттик эсепти текшерүүнү жана олуттуу долбоорлорду ишке ашырууга багытталат.