Шаар куруу жана архитектура департаментинин Бишкек шаардык башкы башкармалыгында топографиялык-геодезиялык иштерди санариптештирүү жана заманбап технологияларды колдонуу боюнча онлайн жолугушуу өттү.
Жолугушууга башкармалыктын начальнигинин орун басары Арсен Кыдыралиев, шаардык аткаруу тартуу (ГИС), топография жана шаар куруу кадастры бөлүмүнүн башчысы Иманбек Чороев жана тиешелүү бөлүмдөрдүн адистери катышты.
Иш-чаранын жүрүшүндө “ТИМ КРЕДО” компаниясынын өкүлдөрү топографиялык-геодезиялык иштерди автоматташтырууга арналган «КРЕДО ТОПОГРАФИЯ» программалык комплексин тааныштырышты. Программа инженердик изилдөөлөрдүн маалыматтарын иштеп чыгууга, топографиялык пландарды даярдоого жана геомаалыматтык маалыматтарды натыйжалуу башкарууга мүмкүндүк берет.
Адистердин белгилешинче, мындай санариптик чечимдерди колдонуу топографиялык маалыматтарды иштеп чыгуу сапатын жакшыртып, геомаалыматтык технологияларды өнүктүрүүгө жана шаар куруу тармагындагы маалыматтарды башкаруунун натыйжалуулугун жогорулатууга өбөлгө түзөт.
Жолугушуунун соңунда тараптар кызматташтыкты мындан ары да улантуу жана санариптик технологияларды шаар куруу тармагына кеңири киргизүү боюнча өз ара аракеттенүүнү күчөтүү маселелерин талкуулашты.
