2026-жылдын 6–7-августунда Чолпон-Ата шаарында Евразия экономикалык бирлигине (ЕАЭБ) мүчө мамлекеттердин өкмөт башчыларынын катышуусунда Евразиялык өкмөттөр аралык кеңештин кезектеги жыйыны өттү.

Жыйындын жыйынтыгында бир катар маанилүү документтерге кол коюлду. Атап айтканда, ЕАЭБде товарлардын электрондук соодасы жөнүндө макулдашуу кабыл алынып, электрондук сооданы өнүктүрүү жана бирдиктүү, ачык шарттарды түзүү каралды.

Мындан тышкары, брокерлерди жана дилерлерди биржалык соодага өз ара киргизүү жөнүндө макулдашууга кол коюлду. Бул биржа рынокторунун ликвиддүүлүгүн жогорулатууга жана инвестициялык кызматташтыкты кеңейтүүгө багытталган.

Ошондой эле илимий наамдар жөнүндө документтерди өз ара таануу боюнча макулдашуу түзүлдү. Анын негизинде илимий жана илимий-педагогикалык кызматкерлердин жумушка орношуусундагы административдик тоскоолдуктарды азайтуу максат кылынат.

Жыйында ЕАЭБ өлкөлөрүнүн азык-түлүк коопсуздугу, жалпы агрардык рынокту өнүктүрүү жана өз ара сооданы кеңейтүү маселелери да талкууланды.

Кийинки Евразиялык өкмөттөр аралык кеңештин жыйынын 2026-жылдын 1–2-октябрында Минск шаарында өткөрүү пландалууда.