Маданият, маалымат жана жаштар саясаты министрлиги Сулайман-Тоону ЮНЕСКОнун Дүйнөлүк мурастар тизмесинен чыгаруу идеясын колдобойт. Бул тууралуу министр Мирбек Мамбеталиев журналисттерге билдирди.

Министрдин айтымында, Сулайман-Тоого канаттуу жол куруу демилгеси Ош шаарынын мэринин жеке сунушу болгон. Бирок мындай долбоорлорду ишке ашырууда Кыргызстандын мыйзамдары жана маданий мурастарды сактоо боюнча эл аралык милдеттенмелери эске алынышы керек.

"Бул демилге терс жооп алат. Биз карманууга тийиш болгон эл аралык талаптар бар. Сулайман-Тоо - ыйык тоо, ошондуктан биз аны сакташыбыз керек", -деди Мирбек Мамбеталиев.

Сулайман-Тоо 2009-жылы ЮНЕСКОнун Дүйнөлүк мурастар тизмесине киргизилген.