Шанхай кызматташтык уюму менен Бириккен Улуттар Уюму тынчтык жана туруктуулуктун тарапташы болушу керек. Бул тууралуу президент Садыр Жапаров Бишкекте өткөн "ШКУ плюс" жыйынында билдирди.

Мамлекет башчысы Кыргызстан көп полярдуулукту глобалдык маселелерди чечүүгө катышкан мамлекеттердин чөйрөсүн кеңейтүүгө, өнүгүүнүн ар түрдүү жолдорун, маданияттарды жана салттарды урматтоого негизделген процесс катары карай турганын белгиледи.

"Биз үчүн адилеттүүлүктүн башкы критерийи - ар бир мамлекеттин үнүн эске алуу жана эл аралык ченемдердин бардыгы үчүн бирдей жана кынтыксыз колдонулушу. Дал ошондуктан Кыргыз Республикасы калыптанып жаткан көп полярдуу дүйнөнүн өзөгүндө Бириккен Улуттар Уюму кала бериши керектигине бекем ишенет", - деди Садыр Жапаров.

Президент БУУнун ишинде орун алган кемчиликтер анын ролун алсыратууга же Уюмду айланып өтүүгө себеп болбошу керектигин айтты. Тескерисинче, бул БУУну биргелешип чыңдоо, анын натыйжалуулугун жогорулатуу жана заманбап реалдуулукка ылайык механизмдерин өркүндөтүү зарылдыгын көрсөтөт.

"Кыргызстан Бириккен Улуттар Уюмун, анын ичинде Коопсуздук Кеңешин реформалоону колдойт. Мындай реформа кеңири макулдашуунун негизинде жүргүзүлүшү керек", - деди президент.