VI Дүйнөлүк көчмөндөр оюндарынын алкагында «Көчмөндөр санаты» эл аралык салттуу музыка фестивалы бүгүн старт алат.  Бул тууралуу Маданият, маалымат жана жаштар саясаты министрлиги билдирди.
Маданий иш-чара, бүгүн 2-сентябрда саат 16:00дө, Чолпон-Ата шаарындагы Чыңгыз Айтматов атындагы «Рух Ордо» маданий-этнографиялык борборунда расмий ачылат.
Маалыматка караганда, 2–5-сентябрга пландалган фестиваль дүйнөнүн ар кайсы өлкөлөрүнөн келген салттуу музыка өкүлдөрүн, музыканттарды, окумуштууларды, изилдөөчүлөрдү жана устаттарды бириктирет.

Эл аралык сынакка 77 катышуучу — Кыргызстандан 17, чет өлкөлөрдөн 60 өнөрпоз катышууда. Ал эми фестивалдын илимий программасына дүйнөнүн 23 өлкөсүнөн окумуштуулар катышат.

Программада эл аралык сынак, илимий-практикалык конференция, мастер-класстар, чыгармачылык музыкалык баарлашуулар, концерттер жана жыйынтыктоочу Гала-концерт каралган.