Кыргызстан 2028-жылкы футзал боюнча Азия кубогун өткөрүүгө талапкер болууда. Бул туурасында Кыргыз футбол биримдиги  кабарлады. Маалыматка ылайык, аталган уюм Азия футбол конфедерациясына расмий билдирме жиберген. 

Уюмдан билдиришкендей, футзал боюнча Азия кубогу континенттеги эң ири мелдештердин бири болуп саналат. Анын финалдык баскычында Азиянын 16 улуттук курама командасы башкы байге үчүн ат салышат.

Билдирменин алкагында Кыргыз футбол биримдиги АФКга турнирди өткөрүүнүн комплекстүү концепциясын сунуштады. Ал концепцияга өлкөнүн спорттук объектилери, машыгуу аянтчалары, мейманкана инфраструктурасы, ошондой эле транспорттук жана логистикалык мүмкүнчүлүктөрү камтылган. Сунушталган документтер АФКнын бардык регламенттик талаптарына толук жооп берет.

Кыргызстандын инфраструктурасын жана мелдешти кабыл алууга даярдыгын баалоо үчүн Азия футбол конфедерациясынын өкүлдөрү ушул жылдын 30-сентябрынан 2-октябрына чейин өлкөгө инспекциялык сапар менен келүүнү пландаштырууда. Сунушталган документтерди жана бул текшерүүнүн жыйынтыгын изилдеп чыккандан кийин, АФК 2028-жылкы Азия кубогун өткөрө турган өлкөнү расмий жарыялайт.

Белгилей кетсек, Кыргызстан буга чейин футзал боюнча Азия кубогунун тандоо оюндарын 3 жолу өз үйүндө кабыл алган. Футбол союзу бул тажрыйба өлкөдө эл аралык деңгээлдеги футзал мелдештерин өткөрүү тажрыйбасы бар экенин тастыктайт деп эсептейт.